Жұрт қарсы шыққан соң Белградта коменданттық сағат енгізбейтін болды
https://www.azattyq.org/a/30717554.html

Тұрғындардың жаппай наразылық танытуы Сербия үкіметін коронавирус инфекциясына байланысты ел астанасында осы аптаның демалыс күндері коменданттық сағат енгізу жоспарынан бас тартуға мәжбүр етті.


Шектеу шарасына байланысты Белградта демалыс күндері он адамнан артық жиналуға тыйым салынған. Мейрамхана, дүкен және өзге қоғамдық орындар сағат 21-де жұмысын аяқтайды. Саябақтар мен өзге де ашық жерлер сағат 23-ке дейін жұмыс істейді. Үкімет жетекшісі Ана Брнабич коменданттық сағат індетке қарсы ең тиімді шара болар еді, бірақ билік аралық амалды қош көрді деп мәлімдеді.


Президент Александр Вучичтің партиясы жеңіске жеткен 21 маусымдағы парламент сайлауынан кейін билік елдегі эпидемиологиялық ахуал тағы да нашарлап кеткен соң мамыр айында аяқталған карантин шарасын қайта енгізе бастады.


7 шілдеде коронавирус салдарынан 13 адам қайтыс болған, бұл елде індет басталғалы бір күнде тіркелген ең көп көрсеткіш. Сол күні Александр Вучич Белградта коменданттық сағат енгізілетіні, бес адамнан артық жиналуға тыйым салынатыны туралы мәлімдеген. Биліктің бұл шешіміне тұрғындар жаппай наразы болды. 9 шілдеге қараған түні Белград пен өзге қалаларда жүздеген адам карантинді күшейтуге қарсылық білдіріп, шеруге шықты. Митингілердің соңы тәртіпсіздіктерге ұласты. Полиция 150-ден астам адамды ұстады. Жұма, 10 шілдеге қараған түні наразылық қайта жалғасты, бірақ бұл жолы бейбіт өтті.


Кейінгі мәлімет бойынша, пандемия басталғалы бері Сербияда 17 мыңнан астам адамның коронавирус жұқтырғаны анықталған. 352 адам қайтыс болды. 13,5 мыңнан астам адам жазылды.


 

10.07.2020 Комментарии Telegram

Тоқаев шетелдіктерге жер сату мәселесіне "оралмауға" уәде етті
https://www.azattyq.org/a/30719137.html

Қазақстан президенті Қасым Жомарт Тоқаев 10 шілде күні үкіметтің кеңейтілген отырысында шетелдіктерге жер сату туралы сөз болмауы керек деп мәлімдеді.


2016 жылы Қазақстанда ауыл шаруашылығы жерін шетелдіктерге сату және ұзақ мерзімге жалға беруді қарастыратын даулы өзгерістерге халық жаппай наразы болған соң билік бес жылға мораторий жариялаған. Оның мерзімі келесі жылы аяқталады.


"2021 жылы Жер кодексінің жекелеген нормаларына жарияланған мораторий аяқталады. Осыған байланысты бұл мәселе жөнінде түпкілікті шешім қабылдауымыз керек. Негізгі мәселені айқындап алдық. Жер шетелдіктерге сатылмайды. Бұл мәселеге енді оралмаймыз", - деп мәлімдеген Тоқаевтың сөзін келтіреді Ақорданың баспасөз қызметі Twitter'e.




Қазақстанда коронавирус пандемиясы қатты өршіп, аурулар мен өлім-жітімнің көбеюі, дәрі-дәрмек қат болып, ауруханаларда орын жетіспеуі елдің наразылығын күшейтіп, Тоқаев пен оның үкіметіне сынды үдеткен.


Тоқаев 13 шілде – Қазақстанда коронавирус инфекциясынан көз жұмғандарды аза тұту күні деп жариялаған. Бұл күні ел астанасында мерекелік отшашу жасалғанына тура бір апта толады. Қазақстанда Астана күні деп белгіленген 6 шілде елді отыз жылға жуық басқарып, былтыр өз орнына көп жылғы саяси серігі Тоқаевты қойып кеткен бұрынғы президент, бірақ билікке әлі де ықпалын жүргізіп отырған Нұрсұлтан Назарбаевтың туған күнімен дөп келеді. Назарбаев биыл 80 жасқа толды. Сол күні Нұр-Сұлтандағы отшашу коронавирустан өлім-жітім көбейіп, қайғы-қасірет шегіп отырған жұрттың ашу-ызасына тиді.


Жыл басынан бері Қазақстан экономикасы 1,8 пайызға төмендеп, пандемия кесірінен қызмет көрсету саласы 5,6 пайызға кеміген. Мұндай мәлімет 10 шілде күні Тоқаев қатысқан үкімет отырысында айтылды деп жазды президенттің баспасөз хатшысы Берік Уәли Facebook-тегі парақшасына.


Карантин мен мұнай бағасының құлдырауы (сәуір айында ең төменгі деңгейге түсті) "бюджет кірісінің күрт кемуіне әкелді", - деді Тоқаев. Оның айтуынша, биылғы республикалық бюджеттің кіріс бөлігі 1,7 триллион теңгеден (төрт миллиард доллардан астам) қағылды. "Бюджет тұрақтылығы Ұлттық қордан аударылған трансферттер есебінен қамтамасыз етіліп отыр" деп мәлімдеген президенттің сөзін келтіреді баспасөз қызметі. Биыл Ұлттық қордан бөлінетін трансферт көлемі 4,7 триллион теңгеге (11 миллиард доллардан астам) дейін көбейтілген.


COVID-19 індетінің асқан қарқынмен өршуіне және пневмониямен ауырғандардың күрт көбеюіне байланысты билік 5 шілдеден бастап екі апта мерзімге карантин енгізген. Қызмет көрсету, бөлшек сауда саласында саласында бірқатар кәсіпорындар жұмысын тоқтатты, адамдардың жүріс-тұрысына шектеу қойылды, қалалар мен аймақтар арасында автобуспен жолаушы тасуға уақытша тыйым салынады.

10.07.2020 Комментарии Telegram

Тоқаев медициналық сақтандыру қоры мен "Фармация" басшыларын қызметтен алуды бұйырды
https://www.azattyq.org/a/30717810.html

Қазақстан президенті Қасым-Жомарт Тоқаев жұма, 10 шілде күні үкіметтің кеңейтілген отырысында әлеуметтік медициналық сақтандыру қоры (ӘМСҚ) мен елдегі дәрі-дәрмек жүйесін реттейтін "СК-Фармация" компаниясы басшылығын "босатуды" тапсырды. Бұл туралы Ақорданың баспасөз қызметі хабарлады. Үкімет отырысы телеарнадан көрсетілген жоқ, жұртшылық ақпаратты тек президенттің баспасөз қызметінің Twitter-аккаунты арқылы біліп отыр.


"Тергеу жүргізіп, қиындыққа кінәлілердің бәрін жауапқа тарту керек. ӘМСҚ мен "СК-Фармация" жетекшілерін босату не қажет болса тергеу жүргізу керек", - деп мәлімдеген Тоқаев.


Президент денсаулық сақтау министрлігінің "бірқатар елеулі қателік" жібергенін, әкімдердің көбі өз жұмысын дұрыс атқармағанын, үкімет оларды бақыламағанын айтып, сынаған. Дәл осындай сөзді Тоқаев Қазақстан азаматтарының ауруханаларда орын жетіспей жатқаны, дәріханаларда дәрі-дәрмек жоғы туралы шағымдары көбейгеннен кейін 8 шілде күні телеарнадан берілген видеоүндеуінде айтқан еді.


Тоқаев денсаулық сақтау министрлігінің бұрынғы басшылығының "пандемияға тойтарыс беруге әзір болмағанын", вирус жұқтырғандар мен "өзге көрсеткіштер бойынша олардың болжамы дұрыс болмағанын" айтты.


Жұма күнгі үкімет отырысында Тоқаев коронавирус пандемиясы салдарынан 2020 жылға арналған республикалық бюджеттің кіріс бөлігі 1,7 триллион теңгеден (төрт миллиард доллардан астам) қағылды, бюджет тұрақтылығы Ұлттық қордан аударылған трансферттер есебінен қамтамасыз етіліп отыр деп мәлімдеді. Биыл Ұлттық қордан бөлінетін трансферт көлемін 4,7 триллион теңгеге (11 миллиард доллардан астам) дейін көбейтілген.


АҚШ-та орналасқан Джонс Хопкинс университетінің деректері бойынша, коронавирус жұқтырғандардың жиынтық саны 54747 адамға жеткен Қазақстан осы көрсеткіш бойынша дүниежүзінде 31-орында тұр. Осы айда денсаулық сақтау министрлігі елде вирус жұқтырғандар бұдан да көп болуы мүмкін екенін мойындады. Кейінгі бірнеше аптада тәулік ішінде анықталған вирус жұқтырғандар саны бірнеше рет ұлғайып, бұрын-соңды болмаған көрсеткішке жетті.

10.07.2020 Комментарии Telegram